十年冇寫「部落格」

真係好抱歉，我知道有好多我嘅fans都好失望，個仔都已經五歲啦，我十年都冇update過我嘅「部落格」，前排去完倫敦真係想寫好多嘢放係度，但係我癲咗咁嘅口水佬真係寫一日嘅經歷可以寫咗成二千幾三千字，雖然會有插圖，但係我諗fans都冇心機睇。



哈哈，估唔到而家Blogger有AutoSave啦(終於都)，咁就唔駛嘢嘢要係notepad度寫晒先敢post上嚟。



最近工作上經歷咗啲問題，搞到好麻煩，要四圍揾免費法律諮詢，到而家都未定斷，唉，long story，總之就煩爆。呢個時候朋友嘅重要性就顯現，我個識咗廿年嘅老死就幫咗我唔少，雖然而家仲係過渡期，但係應該可以順利過渡！



我真係好鬼羨慕我呢個老死，娶咗個好老婆，成家立室，仲幫佢躉咗件好鬼趣緻嘅B出嚟(係我契仔嚟架，我係佢嘅終生電腦加跆拳道教練)，真係羨殺旁人。搞到已經修咗身嘅我(即係讀完書，唔係纖體嗰啲修身)，真係要認認真真揾返個人齊家，咁就有推動力去治國平天下。隻B好可愛架，表情多多，又靚仔，等我train到佢「溝遍天下唔敵手，香港靚女盡低頭」！



最近越嚟越發覺自己有個好嚴重嘅問題：就係唔識點同蠢人做嘢，同埋點樣去deal with佢地。呢樣真係 神俾我最難嘅功課。話說我join咗HKBN嘅寬頻，咁就要轉我嘅email address啦，咁我好奇怪佢地一直都淨係寄啲歡迎信件，你個login就有啦，但係就係冇一封信係講你聽你個email點setup，咁以我呢個已經係呢個行頭浸淫咗咁多年，有啲嘢你唔話我聽我都可以自己揾到嘅，於是我就上網揾返佢地個SMTP同POP3 server名啦，點知揾到但係用唔到，因為HKBN前身係CTI，有好多前人留落嚟嘅嘢仲係度，咁我試咗幾個方法都唔得，就email佢地問吓啦，點知冇人覆，唯有打電話去問，佢地居然可以話俾我聽啲資料應該會係email俾我喎，咁我就抓爆頭，我都未setup到個email，個account又冇webmail，咁你將我要setup email嘅資料email去一個我都未setup到嘅email度，我點check呀？咁我check唔到我又點setup呀？咁我setup唔到又點check呀，咁我..........等等，咁樣都唔係辦法嘅，你不如好心話我聽個POP3係乜啦，其他嘢我自己會搞點架啦，唔該晒......................死啦，再係咁對多幾年呢類人，我會唔會變「拉加」架？！

我舊公司啲traders同同事都係咁上下，故事多到我要講我諗你要嚟揾我食早餐開始講起，咁同日食完晚飯應該都講得完嘅，例如，有次有個trader自己上網揾咗啲資料要print，咁佢跟住就走去個printer度等，點知等極都等唔到，佢唔明就返埋位再print過，又係冇嘅，咁啱個admin行過部影印機見到有printout就拎返俾佢啦，跟手佢就走過嚟發老脾問我點解佢啲printout會去咗printer 4度而唔喺係返平時嘅printer 3度出嚟，咁咪埋去佢部腦度望望啦，好彩之前嘅setup係print完之後個server會有個message話返俾個user聽佢嘅printout幾多張紙已經係邊部printer成功print咗，咁我一行埋去就見到個message仲係個畫面度，寫住printer 4，咁我咪好聲好氣同佢講話你係print咗去printer 4度喎，所以就唔會係printer 3度出嚟嘅，跟住佢居然可以惡過我，同我講話佢都冇print過落printer 3度，問我點解會咁，大佬，我點知你之前做咗啲乜呀，你係print咗落printer 4度，好正常係會係printer 4度出架啦，個system唔會覺得係有問題架喎，佢話佢咩都冇做過(通常啲user都係咁講架啦，唔同做賊嘅話你聽佢係賊咩)，淨係就咁噤Ctrl+P，咁我咪同佢試多次啦，都係指住printer 4喎，咁我咪同佢講話佢只需要用1秒鐘時間望望個printer prompt，confirm返係咪佢要嘅printer就得啦，點知佢嘅回覆居然係：「1 second is a long time」，我諗都冇咩好講。如是者我就問佢係咪好少機會用其他printer，佢話係，於是我就幫佢兜嘢剷晒其他printer，等佢冇得揀，冇得揀咪唔駛煩囉！我覺得我係匡智會度做緊咁，吹漲！