懶之過─血染的風采

真係講你都唔信，一時懶惰之過，搞左壇血染的風采！唔知係咩原因，我件好鍾意嘅三SPIRT白恤衫染左一噠噠啡紅色，初頭以為係我擺埋件粉紅色嘅polo恤落去D白色衫度一齊洗，但係洗完過水再過水都係懶得「浪」，結果濕疊疊「up」住搞到咁，但睇真啲，連件粉紅polo都有呢個問題？咁究竟呢D色係o係邊度整返嚟嘅呢？唔通之前擺過係地板一段時間，本身又有些少濕引至？冇理由呀，唔通地板甩色咩，咪玩啦！但係真係好frustrated！好似之前試過大廈洗水缸，又係唔記得洗一機吉機等啲污水去晒先洗白色衫又係搞到變晒黃，不過上次搞得掂但今次落左半支漂白水都好似唔掂，心情忐忑。

仲要揾勻全屋都一個大少少嘅兜要嚟浸衫都冇，卒之係好聰明地用左個洗衣機作為一個大又攞正牌浸衫嘅「大兜」，但係到而家都冇乜起色，睇見右圖真係慘不忍睹！

卒之發生左

好期待嘅事卒之發生左，就係我出左部Nokia N73！估唔到諗左咁耐，出部電話都會有故仔講。話說我一直都係諗住用老電嘅3G優先試優惠，簽佢地嘅「盡情盡享」計劃嚟買機應該係最著數，個plan又平，買機仲有回贈，而如果唔買機，齋上台12個月呢都可以unlock佢地部華為U636，賣鬼左佢都可以執返五、六舊，於是我去睇下其他店舖同providers嘅promotions，確實呢個策略係最完美，畢竟都係冇乜邊「恕」有更好嘅優惠：DBS上CSL台可以回贈$2000，部機就變為$2688，但係就要sign up$298嘅plan成18個月，「3」仲揾笨，要出兩個號碼先至得果$1700回贈。咁就疊埋心水準備同老電出機啦。

有日我食晏經過沙田廣場嘅領域，見到部N73嘅領域進口價係$3990，好似好平咁，心諗如果簽12個月約而可以拎走部unlock左嘅華為去賣，咁就真係平到嘔，點知我去領域問佢地係咪行貨嘅時候，佢居然答我$3990係原裝進口貨？聽到我拗晒頭？原裝但係又係進口？咁我問佢係咪即係水貨，佢就電話錄音咁同我講多次：「係原裝進口貨」，正！咁即係冇計啦，咁我就把心一橫同老電出機啦，咁打電話去預約，叫佢地留返部蝙蝠紫嘅N73俾我，咁個姐姐同我講話唔駛留，如果佢地冇晒可以去門市搞。咁岩佢地沙田嘅客戶服務站就正正係我公司樓下，咪約到佢今日最後一個時段囉，即係19:40。特登留係公司做夜少少，諗住決定左就早啲搞點佢啦，我早左少少到，門口個姐姐同我搞完啲手續入到去，佢先同我講佢地果度已經冇晒蝙蝠紫嘅N73，得返火蟻紅，男人老狗，點用紅色手機呀，於是我就叫佢地同我安排去以下任何一個區域嘅分店搞啦，分別係沙田、觀塘、油尖旺、同銅鑼灣區，都好闊啦個range，點知佢問到觀塘物華街分店有貨，幫我留起左一部，當時已經八點二，佢地話間舖閂九點，咁我咪離開沙田速去觀塘囉，一入火車閘係月台等緊車，佢夠膽死打電話同我講話其實間舖閂八點，叫我唔好白行一趟！嘩，係可以想像到果一刻我個爽晒嘅樣！慶到傻嘅情況下實打去老電鬧佢一餐啦，點知俾個令我更爽嘅o靚妹係咁同我講公司規矩上台係要make appointment，但佢地唔會同客留電話，咁我係咁問佢如果唔係想serve得我好啲，費事我去到做唔到我想做嘅野咁點解要make appointment呢？！佢就登時唱牒跳線，用「因為係公司policy」呢句說話rap左我幾次，yo yo，我話要同佢個supervisor講，佢同我講話兩個supervisors都講緊電話，咁我就叫條o靚妹叫呢兩個supervisors嘅supervisor嚟當時真係激爆，冇理由出返閘擺返個電話返公司等第日再落過去觀塘架嘛，係完全好似吹佢地唔漲嘅情況下，我照樣上左火車呆坐係一角，帶住極度唔忿氣嘅心情再打過去老電，今次呢位仁兄就好尊重劉華講嘅野啦，幫我剿晒三間旺角嘅老電分店有冇貨，跟手幫我訂埋機約好晒，我淨係需要落去分店話係姓柳就得，真係今時今日咁嘅服務態度先至得架嘛！

雖然出機果陣老電個姐姐係咁同我講冇乜人出呢部機，因為佢地做Sony Ericcson嘅K800i同K610i優惠真係好鬼扺，同埋部N73家陣都仲算係貴。搞到我個心真係15/16唔玩唔舒服，如題，買N73嘅事實卒之都發生左，而另外一樣幾爽嘅事就係我特登用中信嘉華嘅信用卡去俾錢，諗住佢有呢個乜都分得期嘅優惠，點知(係第幾個點知呢？)佢地六月底已經冇左全免息分期，而家係要收一次性嘅手續費，咁咪即係要俾息！我擺係銀行一年都冇$100息啦，不過卡已經簽左，唔分期就要一次過俾晒，一啲 so都冇，唯有照go啦...............

真係估唔到咁都會有故仔講。可以係香港嘅merchants身上面發生嘅事實在太多，香港呢個社會真係un頂able呀！

公司船河

今日應邀出席老細搞嘅遊船河，同一班新公司嘅同事加埋佢地嘅朋友仔，總數26人。起初覺得公司啲同事唔係咁玩得，同埋呢個船河嘅目的似係果班玩得叻又根本淨係想去玩wakeboard嘅人約埋一齊去wake咁，呢個船河會好悶，結果呢個諗法都算係半成立。慶幸佢地帶嚟嘅朋友仔都算幾玩得，同埋係云云出席嘅人嘅age group由廿頭到三十尾入面，廿尾嘅佔多，唔係我諗我都會係全程齋曬悶爆。

既然係公司function，應該有好多公司嘅人，但係數據顯示JPMC對non-JPMC員工比例係10:16，而男女比例居然都係相同比率，不過係16男:10女，當中重要係有4對情侶，假設其餘全部男女為單身，單身男女比例係12:6，兩男對一女，哈哈。 雖知鮮花嘅美艷係需要綠葉嘅扶持，縱然船上風光未如理想，絕大部份女仕都非常玩得，我尤其欣賞我同事Rebecca同佢兩個fds，俾咁多男仔夾住玩都冇問題，並非如當初我以為佢地比較內斂嘅諗法。

本來一眾游上灘係想玩數字球，點知一到步冇耐就有隻好趣緻同乖巧嘅Labrador Retriever撲過嚟搶我地個波玩，搶波唔成功，索性咬爆佢，一拍兩散，搞到我地一班上氣唔接下氣，冇左半條人命咁游埋岸嘅人兄極其無奈，最後我提議用水泡同係水入面玩數字「水泡」，我比較鍾意玩生果版，因為好快大家就會唔記得晒啲生果名，分分鐘連自己果個都忘記埋，會好搞笑，再玩埋級豬際，笑到你傻，但係呢班人嘅忍耐力實在有限，好快就要轉玩食肆版，突然間學到好多聽都未聽過嘅餐廳名，哈哈！班女仔實在太純啦，一級豬榮升五級豬嘅都發生過，結果唔駛半個鐘頭已經有人七級豬畢業！但畢竟岸上嘅風光遠比船上好，比晒堅尼嘅情景真係此起彼落，比比皆是，目光稍一不留神，你會輸得好慘。

最後大家帶住攰到癲左咁嘅心情同餘慶離開西貢碼頭，離開前影張大合照先啦！

好"有為"嘅信用卡"優惠"

收到AE嘅優惠推介，尋晚去左呢間位於灣仔嘅懶高級印尼餐廳，乃 Elite's Group (http://www.elite-concepts.com/)旗下名為峇里餐廳(Dirty Duck Diner)嘅食店，指定晚餐75折，A-la-Carte就85折，所謂嘅AE Select只得一個四人套餐原價$7xx現特價$555。呢間餐廳嘅野食就ok啦，但價錢就嚇死你！我地得兩丁友就無理由嗌四人餐架唶，所以唯有叫A-la-Carte，85折試下啲懶high卡嘅印尼餐都ok呀。一坐低就問我地要啲咩飲，諗住叫杯水先啦，點知佢同我嚟支Acqua Panna，我諗住算啦，有85折，貴極有個譜唶，跟住我地叫左個沙爹雞、峇里鴨、香辣蝦、同埋茉莉花香飯。除左個峇里鴨乾過我個銀行戶口之外，其他都還可以，但係個香辣蝦都幾辣，而佢地又冇水供應，我地頂唔順要嗌野飲，唯有諗下有咩飲啦，見到第二檯飲椰青咁我就嗌個俾我個hon啦，而自己就諗住死撐到尾，但係最終都忍唔到，要嗌多支水飲！

好彩有阿hon係度食飯，咁餐飯都值回票價，卒之完成左，就嗌埋單啦，張單嚟嘅時候阿hon就check單，發覺支水居然同個椰青係同價，$45大元一支，兩支即係$90！我隱約見到個價錢係$555，心諗就算食唔晒呀，嗌果個特價四人餐都差唔多價錢啦，雖然戇居左，但同阿hon食唔緊要啦，於是我就出示我張The Black Card，心諗85折之後都係$47x，ok啦，點知佢攞左張單去計返個discount俾我返嚟，隊左兩張單俾我話85折淨係apply係食物(佢嘅所謂A-la-Carte)，飲品係唔計在內嘅，所以一張單係食物嘅85折，而另一張就係兩支水同個同價嘅椰青！最後咁樣計法，我張單係$501，死都平唔過$500等我心安理得無戇居到！吹漲，早知係咁我頭先就攞佢俾我地飲豪華水果隻杯入去廁所度斟水喉水啦！

AE Selects原來係stands for "Assassinate Express Select"，即係選擇性暗殺速遞！！一個唔該就暗中掠左我一筆甘嘅！

新髮型，新形象

白條子恤衫、白黑間領呔、帶啡金嘅短束髮型、佩帶隱形眼鏡後嘅我，滿以為今早美國大老闆到步，需要俾佢老人家一個好啲嘅形象，點知晨咁早起身，死趕爛趕八點半返到公司，我後面果位同事就同我講話我地大佬今日請病假，美國大老闆就因為上個禮拜搗破左嘅英、美恐怖襲擊而唔敢嚟香港，而我呢？就煲埋啲無米粥，淨係得我行入對面office嘅時候一班大驚小怪,甚少見人打呔返工嘅同事「嘩」過一聲.......

近期經歷嘅事都係唔開心，對我最好又照顧周到嘅兩公婆好友又唔係香港，希望改變左形象之後生活上會有D突破啦！

失敗嘅男人

一個男人可以有幾失敗？Hmm......三十歲人一事無成啦、做左咁多年野都係揾雞碎咁多啦、冇乜特別專長值得驕傲啦、冇乜專注嘅興趣啦、身邊揾個可以交心嘅知己朋友都冇啦、從來都唔會有人理你感受啦、最失敗係連自己身邊認為最信得過嘅女人係唔係愛自己都唔知啦，係咪自己set個目標set得太不切實際，好似遙不可及，我究竟係發緊夢查實我而家好好呀，定係我以為自己好好係發緊夢？原來人地對唔對你好、錫唔錫你、愛唔愛你，真係冇得要求，冇得sales架，家下《愛情全保》都大結局啦，好似冇左一個channel俾我去超現實咁去追求開心嘅生活...........作為一個基督徒，究竟我對開心幸福嘅生活嘅定義係咪定睛錯左呢？身邊冇一個對自己100%忠誠嘅女人同自己一齊去體驗同經歷生活，個人好似就冇晒目標咁，要玩都玩過晒，要買嘅野都買過晒，唔通仲要用買野俾自己，格硬揾野去玩去做嚟set 啲目標俾自己先至可以令個人充實啲？死啦，咁嘅年紀仲諗緊呢啲問題，我係咪本身都好有問題呢？

莫非我嘅寂寞同孤獨係自己攞嚟？回想footprint一文， 神，此刻嘅腳印係祢定係我架？

發人深省嘅一句

《愛情全保》雖然有啲太過完美主義，但當中都有發人深省嘅場面同對白。查實香港生活太忙碌，個個都淨係顧住做野同進修增值，好容易忽略左身邊嘅人，真係要同身邊嘅人多啲溝通，唔好俾自己後悔。

等我好好記住呢句發人深省嘅對白：
『俾你揾到幾多錢，爬到幾高又點呀，身邊冇個最愛嘅人同自己一齊分享，一切都冇晒意思！』

港女七宗罪 - 文章轉載

多年前讀過呢篇文章，覺得好正，係度分享下先，唔係我寫架，諸位我認識嘅女仕，唔好X我呀！
~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~
『在上月統計處公布香港女多男少情況漸趨嚴重的當天，恰巧接到一名舊同事Y來電告知結婚喜訊，新娘子是上海人，男同事在頻撲往返兩地繫情緣兩年多之後，終於決定拉埋天窗。

興返大陸娶老婆

一群舊日女同事聞訊，欷歔比戥人開心者為多，有些語氣中還隱含敵意─「Y條件都唔錯，點解要娶個大陸妹？點解依家啲男人咁興返大陸娶老婆？唔怪得香港男人愈來愈少啦！」女同事的思維，明顯地還停留在十多年前窮阿伯在香港找不到伴，就拿丁點錢回鄉「買老婆」的舊框框裡；事實是：放洋拿到MBA學位的Y，太太也屬國內名牌大學出身，兩人是在互有選擇空間的情況下揀選對方為終身伴侶；婚後男同事還計畫藉著太太的人際網絡，到上海大展拳腳。
認識的香港單身女性亦似乎愈來愈多──有些是真正的「美麗新女性」，保持單身，是因為早就決定「不婚」，反正經濟條件優渥，偶爾拍拍散拖其樂無窮；但說實在話，有頗多女友是在「無得揀」的情況下繼續其孤家寡人。私交甚篤者，在happyhour期間還會直言：「有好男人速速介紹！」

港女出了什麼問題

有男人告訴我，有一個ICQ網頁，是一個專門為「蒲友」而設的討論區，供大家分享獵艷/冶遊情報，所以會登入的幾乎都是男人，但他們偶爾也會在其中分享一些心情和看法，在「沒有女人會介入」的設定下，他們的對話完全表露出「哥兒們」的坦誠。

我在那裡找到一個回應最多的題目，居然便叫「香港女人七宗罪」，內容是一個自稱「小魔」的港男，在答應朋友Ａ和其女友Ｂ到泰國陽光與海灘一番之後，Ｂ小姐再約Ｃ、Ｄ兩名女友同遊，結果陽光之旅最終變成SPA美容之旅，小魔亦無奈地成了Ｃ、Ｄ的觀音兵（小魔再三聲明從未想過「追女」），節錄小魔氣憤之作如下：

在五天的行程中，如果不是碰見盜墓者羅拉及青春版關之琳（泰國美女），怕小魔已經給人氣死了，以下是他所羅列的香港女人七宗罪：

1.自我中心:
今次旅行本來講明係陽光與海灘，想不到因為兩個女人的堅持，結果變成了扮靚團，多謝都沒講句？老奉咩？

2.藉口多多，永不認錯:
本來行程改了就改了，還要找諸多藉口要人認同，
e.g.C：「你看做完SPA不是靚仔多了，跟我哋實無錯。」
D：「你都同意行程！，唔同意可以唔嚟！」
小魔心想:（XYZ你，我交了錢才同我講改行程）

3.大細超:
C、D小姐約了小魔吃早餐，結果遲到個多鐘，一句「對唔住」都無。兩日後，她們行街早完了，所以早到了30分鐘，碰巧小魔遲到15分鐘，C、D即時發脾氣：「你有無搞錯，遲到成個鐘！我們等了你一個鐘啊！」

4.天生老屈:
C、D:「我哋唔理，你遲成個鐘，我哋而家心情唔好，這餐你請，鬼叫你搞到我哋乜mood都無！」
小魔心想：（XYZ你，你早到，要我請，你那天遲到一句對不起也沒有，我夠乜mood都無啦）

5.自大成狂：
C:「好平!好平!呢度做SPA真係好平啊!」
小魔：「都唔平，成千銀港紙，我就好肉痛，泰國人分分鐘一個月才賺咁多。」
C:「咁當然啦!你估佢哋可以賺幾多呀?」（語氣極之高傲）
小魔心想：(你又何德何能，賺得比人多只係你好彩生在香港。)

6.皇帝女:
Case1
C：「小魔，我哋去買under，你唔方便去，你去M記等我。」
小魔:「不如約個地方啦。」
C、D:「唔得，走失咗點算。我哋女仔嚟嘛！」如是者小魔在M記呆等了兩個鐘。
Case2
小魔在沒有任何plan（計畫）的時段準備自己外出，C、D即「詐型」:「你有無搞錯，又唔早啲講，打亂晒啲planning！」

7.無自知之明
本來這條「罪」都沒有這麼明顯，但和我在泰國遇到的「靚靚關之琳」，相比之下，就立分高下，泰國靚女外貌95分，C、D最多得35分，講到溫柔同脾氣更係天同地比……你哋話啦，點揀都唔揀香港女仔啦，哼！在「小魔」的獨白之後，有整整三頁長的回應，只有一位仁兄稱讚香港女性「真誠、善良，裝扮及談吐較佳」（但還要被人即時反駁謂各地良家婦女均有真誠善良等美德，豈獨香港？而裝扮談吐佳只是香港資源多罷了。）而其他回應大多如下：

一字稱之「寸」
1.香港女人就係咁啦，完全唔會諗自己有咩錯，所以都係對香港女人死心……

2.以前我未結婚前都遇過類似情況，起初我學人扮gentleman，以特佳禮貌相待，點知個女仔以為我想溝她，立刻扮晒野。後來我就直接表示已經有穩定女友，並間接向她透露女友的條件比她高很多，那個女仔的態度立刻改變。

3.香港女仔，雖然唔可以一竹篙打晒一船人，但普遍來說一個字：寸！

4.香港女仔要搵著數時就要你gentleman，平時又話要男女平等！我大學時都讀過soci（社會學），人無可能完全平等，每個人都有自己扮演的角色，只要演得甘心同開心就得，邊有好似啲香港女咁，一時扮女強人，一時扮小鳥。

小魔這群男人不代表全香港男人，但起碼也反映了某些男人對我們香港女人看法，我們擁有的一定不只區區兩、三個優點，但「情場」如「職場」，我們必須不斷自我增值去維持競爭能力（爭到手發覺不合適才捨棄是另一回事），面對周遭湧現的「競敵」和「市場」的不斷流失，縱使我堅決反對為取悅男人而卑躬屈膝，但也是時候去改變一下一些不良習慣了！』

原作者：Rebecca Tang
少數曾執掌成人雜誌的香港「土著女」，現職公關，遊走於特種行業女性及尋常OL之間，相識者眾，是以有幸見識男男女女各式光怪陸離。

夢中情人

呢排最常做嘅就係返屋企睇《愛情全保》，雖然係睇返錄影同埋我睇得好慢，到而家都仲係睇緊第十五集，但係已經睇到我鬼咁開心，因為有我其中一個夢中情人：吳美珩！

佢真係un頂able，咁perfect嘅女人你話邊到仲有得頂？外表冷酷，女強人feel，有本事，但係又係一個好溫柔同賢淑嘅女人，每次睇見佢我都不知幾希望我係戲入面果個陳錦鴻(阿Ken)。好似阿Ken俾人停職，佢同阿Ken講話係佢女友梗會支持佢，扭下計問佢做乜唔同自己講，跟手仲煮埋麵俾佢全家食呀、自己阿姨係唯一親人但係同阿Ken嘅阿爸唔岩都好女兩頭暪嚟來攏關係呀、情侶檔主持節目但係俾人只邀請佢做嘉賓會顧及男友感受呀等等。阿Ken以為佢出左事係架救護車度求婚佢整蠱返阿Ken果度幾se-weet呀.............

不過，我都明白係做戲唶，現今嘅社會邊度有呢種女人架？有本事，就甚少溫柔賢淑，嬌嗲嘅，就多數係套戲阿Maggie果亭人，但係我都相信吳美珩真人都應該係兩者都有，有個咁嘅女人，我就真係錫到佢(火農)晒！

有美同行，羨殺旁人

自從我呢個好朋友介紹左我用呢個weblog之後，我真係好有衝動每日都寫，但暫時就係一有野想share我就嚟寫。

睇返佢寫嘅blog都令我覺得好開心，所以想同大家分享下佢嘅blog，大家係上面嘅search度打viscattery就得，尤其係佢呢期同佢「波士」去環遊世界，跟住佢個blog真係幾過癮，好似同佢地一齊去緊旅行咁，佢寫野亦都好鬼抵死，哈哈~~~

美妙對答 - I'm lovin' it!

服務員：「先生想要啲咩？」
小弟：「一個雙層芝士(子子)堡，一杯細嘅士多啤梨奶昔，同埋一個蘋果批拎走呀唔該。」
服務員：「多謝你十八蚊呀，八達通嘅，等等，ok架啦」
小弟：「.................」
服務員：「唔好意思呀，先生，蘋果批要等喎。」
小弟：「哦，好呀，等啦！」
服務員：「不如你轉兩件雞呀？」
小弟：「唔..............」(樣子並不願意)
小弟心想：「蘋果批係甜架喎，你咪因為收左我錢就求其揾樣同價錢嘅野叫我轉得架，炸『之』唔係『田』架大姐，咁妳都『燃』到，真係I'm lovin' it啦」
小弟：「咁我都係唔要啦，你退返錢俾我啦。」
服務員：「呀....退錢呀.....」
經理介入：「點呀，轉野俾佢啦..............哦，先生你想退錢呀，咁我退返俾你呀。」
小弟：「唔該。」

將會換嘅手機

尋日睇完戲係APM行，居然俾我見到傳說中嘅N73........好興奮，點知原來Nokia係未official announce佢嘅出沒，而且價錢都幾貴，現階段叫價(要訂貨)$4688，俾起已面市而價格又回落左嘅K800i仲要貴少少，真係少少(咪就係貴$8咁大把)，但係兩者都各有長處，搞到我唔知點算。其實係我未得悉呢部N73之先，我係已經定意要買W850i，所以我諗應該等佢出埋先，摸摸手感如何，再等個software穩定啲，俾啲機會啲有錢人幫我地揾晒部機啲bugs出嚟，我先朴鎚都未遲。

再加上我聽講PCCW 3G嘅trial客可以勁優惠價買機同出plan，咁就等等先買呢份生日禮物俾自己！

電影級數

今日同友人睇左《龍虎門》，彼此都認為呢部戲只屬VCD級數，所謂VCD級數，即係只值得買VCD睇就算啦！其它電影級數，包括戲院級，DVD級，甚至BT級，你地可以唔駛考慮入場睇啦！

成套戲嘅武打場面都還可以，甄子丹實有保證啦，謝霆鋒都踢得幾好，余文樂成個角色都可以唔存在，但係整體打鬥就冇《殺破狼》咁正，係開頭係酒樓同之後係日本餐廳係叫做打得最好。

好彩個羅剎女(右邊果位)都幾得，唔係我諗我唔止淨係訓左中間一小段，而係成場訓晒。








跟住去左個舊同事屋企睇佢隻八哥生嘅BB八哥，好得意架，又肥又可愛，但係我自己本人都係鍾情Golden Retriever唶。

真係失望

救命，以為呢份人工高啲嘅工，出糧果下會好興奮，點知我遲左開工俾佢地扣左幾日，同賣生日請左no pay leave，加加埋埋可以扣左我咁多錢！激死我，跟住我諗住話唔請no pay leave請sick leave，點知個agent同我講話請一day病假都要醫生紙，我又真係好想知道我肚痾點攞醫生紙？唔通我攞兜便便去醫生度證明俾佢睇我病然後叫佢出張醫生紙俾我呀？

唉，一心諗住搞個遊船河大家開開心心，點知啲同事搞十年，個仔已經八歲啦，都決定唔到去定唔去，跟手個死人船家又臨時加價，搞到要wake果班無辜要俾貴啲，唔忿氣，我自己再從新搞過，以證明係我個人啲人緣問題定係其他因素.........

乏味生活之一

唉，有時啲野，真係啞仔食黃蓮，公司唔知做乜個「羅友」痕要我地無端端由9點改為返8點半，雖然只係半個鐘頭，但係係朝早呢啲咁關鍵性嘅時刻，15分鐘都可以好大分別，我意思係訓多同訓少嘅分別，咁都算啦，食晏都仲要分開食，因為每一行最少at any one time要有一個人係度。咁大間投資銀行要分批食飯，勁似一間懶高級嘅工廠，而我，已經榮升為一個高級工廠仔(等級有如高級伴讀書僮--同我一樣係周星馳fans嘅你一定明)

另外，因為佢係五大其中一間投資銀行，所以保安實在嚴到爆，係公司我大部份嘅website都係去.......唔到，有時真係吹到你「啤」一聲，唔好講webmail同IM啦，連forum同網上買戲飛你都做唔到，仲要返沙田呢，完全係同被遠禁冇乜分別........再者，後面坐左條超級無聊冇乜貢獻嘅二五，請佢返嚟好似淨係睇住人地幾點返同埋部電腦做緊乜，總之好似乜都關佢事咁，令人好反感！

做野果度冇野令我興奮之餘，學校又追人交數啦喎，不過講真，我呢個所謂research project都寫左差唔多成年，都只不過仲係得個鼻屎咁多野.........但係你明啦，當你冇deadline同有人追嘅分別係會多左份--壓力囉！所以我諗十月前我都唔駛點休息架啦！要快添呀，唔係仲大鑊！

暫時咁睇，年尾我有興趣renew份contract嘅機會真係越嚟越低，差唔多等於零！(哈哈，早年係溫哥華住又睇過國泰電視嘅觀眾就會明呢句)

生活冇乜大起只有小跌，好乏味！

處女作

今日卒之開齋啦，因為我個好友洪太建議小弟有一個係寫中文嘅Blog，所以我都係呢度開個個人嘅Blog，希望可以keep up到regular咁寫。

可以藉此同大家分享下自己嘅感想，第日睇返都幾過癮架。

唉，返就返左一個月度啦，真係眨下眼就過左，仲有兩個零月我就有好多deadline要meet，心情沉重。

今朝出門口死提爛提自己要帶遮，卒之都係唔記得帶，好彩色晨咁早就擺定把7仔遮係公司唶，但係今晚要上堂，又要趕餐死，同埋去聽個阿sir係度認屎認屁，咁又係嘅，佢個樣真係著起龍袍都唔似太子講都冇人信佢係識揸飛機囉！不過我真係好想一嘗呢種滋味，等我讀完即刻去考返個PPL牌先。

等出糧呀，身痕想買野呀，嘻嘻~~