及時擁抱？

不嬲我係感情路上嘅遭遇都好離奇，令我不停反思究竟係咪自己好有問題？身邊認識嘅女子大都係奇人，才廿多歲人已擁有無限經歷，我有興趣及對我有興趣嘅，多數都有一啲「背景」。唔係結過婚嘅就係受過愛情重創。矛盾之處就係如果佢地冇經歷過呢啲事，可能以佢地嘅年紀又唔會有咁嘅maturity，又未必sophisticated enough可以吸引到我。但亦因為佢地受過重創，對愛情同感情嘅睇法亦會變淡，在下再有抱負，再有信心，都只不過係不停享受被潑冷水嘅沐浴新感受！

最近心情都係怪怪咁，忐忑矛盾，有感而發覺得自己好似《一見鍾情》入面嘅黎明咁，佢嘅選擇係唔係啱呢？後來發覺唔啱咁點呢？會唔會對對方好唔公平呢？已經預知會有好多問題衍生，係咪可以單單愛對方可以解決晒，家人嘅睇法又如何呢？嚟到呢度，自己有咁多concerns係查實唔愛對方定係太愛對方而好認真咁考慮呢？講真，啲所謂concerns查實係自己度多過晒任何一個人。要愛係咪應該愛得勇敢啲呢？如果連自己都唔可以勇敢，咁點可以代領到另一半呢？「黎明」呀，你選擇「張曼玉」嘅時候有冇考慮過咁多問題呢？你害怕commit以致「張曼玉」搬走咗你又後悔點解呢？事情已經發生到你地認識嘅階段，你係度諗點解當初唔早啲識到佢，等你可以珍惜佢，而家陣就唔需要有咁多考慮係非常多餘。 此時此刻，我不禁諗起呢首歌─《及時擁抱》，係咪應該把握時機，及時擁抱呢？