全城最蠢嘅DVD錄影機

全城最蠢嘅我買左部全城最蠢嘅DVD錄影機，就係韓國現代(Hyundai) TBH-8020 DVD Recorder，我咁大個仔用左咁多年錄影機都未聽過有一部機係冇得set daily或weekly嘅錄影schedule嘅，呢部仲要係DVD錄影機！舊式四磁頭嘅錄影機都有啦，家陣我如果想錄一個星期一至五嘅節目，我要set五個programs入去，仲要係星期六特登晨咁早走去Times Square嘅AIG同中原搞嘅電器熱賣日排隊買，排左我個幾鐘頭，買左部垃圾返嚟，AIG張信用卡又搞得唔愉快，佢地夠膽死同我講話我綜合申請評分唔及格，真係俾佢吹漲，我申請左咁多張信用卡從來都未試過咁俾人話過.......................睇返自己個blog呢，發現我都好多呢啲咁嘅遭遇，或者係 神要我經歷咁多，等我可以係度警惕諸位追捧我嘅blog嘅讀者小心至上，唔好賴野！

家陣只係買左幾日，唯有打返去中原睇下我有啲咩可以做先？佢地居然肯俾我拎返張單返去加錢換果部，咁我就要去望望邊部機係由呢個功能啦，順便睇埋有冇HDD先！

野笑又有意思嘅電影一齣

近期睇左兩齣戲，《情流戀屋》同《命運自選台》，諗都唔駛諗就知我係想講後面果齣啦！《命運自選台》(Click)係一齣非常野笑但好有意思嘅電影，有意思處除左Kate Beckinsale係索到唔可能再索，真係有個咁嘅老婆你話我話啦，夠晒，搞點晒！而係佢背後帶出嚟果個metaphor，係呢齣戲remind返我學過呢句話：生命冇take two！ 簡單嚟講，主角遇到好多生活上嘅問題，就連想開部電視都搞唔點，於是發脾氣走出街揾universal remote control，當然大家明白係劃一遙控啦，但套戲就幽你一默，universal remote control係可以控制個universe，變相你成個人生本身就好似一齣戲，有晒menu呀，分chapter呀，可以fast forward呀，回憶呀，甚至可以聽commentary添，哈哈！

咁主角好厭惡生活上嘅難題，唔想面對，想逃避而慣性用fast forward呢個功能，結果個remote係有學習能力，每當佢再面對同樣嘅問題就會自動fast forward，因此佢嘅生命就跳得好快，得閒跳下，得閒又跳下，眨下眼又跳幾年，雖然佢就唔駛面對唔想面對嘅問題，但就連人生嘅經歷都冇埋，當佢跳緊chapters嘅時候嘅真人查實係on auto pilot，會自動對答同做日常嘅野但係就冇感情嘅，如是者佢搞到妻離子散，一直以為工作係最重要而忽略家人、一直淨係想享受生命中嘅光榮時候而唔想經歷down time嘅主角，都最後先醒覺乜野先係最重要！

小弟get到嘅metaphor就係人生interesting之處就係能夠經歷down time咁先會識得珍惜up time，生命嘅ups and downs係應該用心會領會！咁野笑又帶出個咁正嘅信息真係好正！最好笑係我同我兩個舊同事笑係全場笑得最大聲果排，好多gag位嚟得好快，好多人都唔識笑，你要o係係外國生活過你先會明，先會識笑，有少少似Jim Carreys果套《衰鬼上帝》(Bruce Almighty)。

再者，真係唔可以唔講多次，Kate Beckinsale真係好好好好好索、好正，睇嚟我應該考慮下揾個鬼妹做老婆啦！哈哈~~

深情分享，心情分享

《幸運水晶》
為何別人盡碰到好的運氣，愛侶信守一輩子不理拋棄，
我怕我真的欠運，遇著的都別離，如上帝不懂公理。

未曾遺忘是妳嗎，水晶給我戴上了增加我福氣沒有太多，
誰人能像我極傻，還迷信戴起水晶球，便箍得緊妳麼？

握得碎的晶石，自願在心中，這掛念會有多重，
仍能原諒妳？仍難忘掉妳！妳卻沒法躲。

自信戴水晶真會轉運，忘掉最重要戴眼識人，
像妳與他竟偷偷的擁吻，比誰亦更加狠，
未信戴水晶真會轉運，全為了共妳太過開心，
就怪我這副命避不過壞人，永沒法吸取教訓。

《When you told me you LOVED me》

Once
Doesn't mean anything to me
Come
Show me the meaning of complete
Where
Did our love go wrong
Once we were so strong
How can I go on?

*When you told me you loved me
Did you know it would take me the rest of my life
to get over the feeling of knowing
a dream didn't turn out right
When you let me believe that you weren't complete
Without me by your side
How could I know
That you would go
That you would run
Baby, I thought you were the one*

Why
Can't I just leave it all behind
I
Felt passion so bright that I was blind
Then
Something made me weak
Talking in my sleep
Baby, I'm in so deep and you know I believed

Repeat *

Your lips
Your face
Something that time just can't erase
Find my heart
Could break
All over again

Repeat *

決定左，有晒方向，個人就可以放鬆啲，雖然會唔捨得，但每當我諗起果一切一切背後嘅事實，就真係心如刀割！

最後通牒，即將爆發

病左，即將要爆發出嚟啦，喉嚨痛，大「痰」展翅，有如滔滔江水連綿不絕嘅鼻，一切，都嚟得好完美，構成一幅美麗嘅圖畫，配合我最近嘅心情，趕功課嘅緊張，再加上不穩定嘅天氣，簡直係天作之合！

諗多左

是否太心急而諗多左？或者阿姐都岩嘅，應該調節下自己嘅心態，唔係會有太多期望，引致太多嘅失望，係自己周旋緊嘅時候，人地已經踏上另一個階段，雖然好難遇到一位懂得欣賞同尊重關係嘅人，但都係唔可以操之過急，好彩阿域又提一提我，免卻撞板，雖然聽左之後有啲失落，但都好過令到阿域都唔知點算好。

笨實的半天

天色已漸沉，落日如霧燈，深深深！今朝起身個天同我個心情一樣：灰色。跟住接二連三嘅笨實事件不斷發生，先係我知道遲到，就鼓起左最大嘅勇氣去叫的士返工，心諗由屋企去沙田會唔會過百呢？駛唔駛叫七折的呢？心諗，叫啦，就算唔過百都有八折，冇蝕，於是就叫左架七折的，落街買個麵包等架車到啦，點知落到樓個天係度落緊狗屎，鬼咁大，行到去冇瓦遮頭嘅地方，全世界係度等緊遮站啲遮﹝話說我住果度係冇遮嘅段落係落雨嘅日子係會有筒遮俾住客借用﹞我就自己攞把遮出嚟啦，果段路突然變得好暢順，去到另外一邊諗住收遮嘅時候就爭啲仆街，買完個麵包返上去平台等車，架的士先岩岩到，上左車之後就起行。原來去沙田係咁鬼遠，我0850去到大老山隧道口，咁就咪埋眼抖一抖，諗住出隧道再睇下個司機駛唔駛我指點迷津，點知好耐都未見曙光，我覺得自己好似入左黑洞咁，0856仲係隧道入面，0858先岩岩出隧道，個表眨下眼已經係$90.6徘徊緊，嘩撞鬼囉，搭個死人大老山要咁鬼耐，仲耐過由我屋企去到港運城門口！跟住0910先返到公司樓下，埋單果陣佢居然同我講話日頭係得八折咋喎，小丙呀，咁早知我call個平時搭開果位仁兄啦！

剛才食晏仲落緊大雨，班同事就話去宜家度食啦，我就懶醒唔行商場走去搭電梯，點知原來係入唔返去個商場度，哈哈，卒之遊完電梯河先至去到............希望淨返落嚟嘅時間唔好再咁白痴啦！

卒之都係避唔過

唉，呢個女子係我生命中出現，或多或少係 神俾我最大嘅一個教訓，終於明白愛係唔可以不停咁為一個人付出淨係嘗試令到佢開心，有壓力亦唔健康。仲記得阿媽講過，哀莫大於心死，一隻碗打爛左仲可以黐返，雖然會有裂痕，但都可以用，就算再打爛都可以再黐返，但係打爛得太多次，真係開始冇乜感覺，最後，始終都係避唔過要分開嘅結果。

今次嘅經歷令到我更加怕女人，死啦，我會唔會變基佬呢？因為女人原來可以好恐怖，可以咁儲心積慮咁去計劃嚟傷害你，就算明知今晚會同你講分開，朝早都仲可以同你嗲下玩下，好驚囉！一心諗住平平凡凡，安安逸逸咁去發展段關係嘅時候，你自己係度覺得冇事發生，以為對方對你好好，好錫你嘅同時，原來背後係隱藏左個咁大嘅危難，我唔會用危機，因為已經冇機會，最正嘅係，呢個好幾個月就嚟一次講分開嘅生活cycle已經由佢take the lead玩左不下四、五次，今次仲居然可以由佢講話係最後一次喎，我真係輸得好慘，體無完膚，係我不嬲都強到爆嘅自信心上打左個好大嘅折扣。原來一直以嚟我都係自作多情，不停為佢付出但係半點感動都冇，好透徹咁俾人玩左成年，我唔到呢刻絕望嘅谷底都唔醒覺原來自己係咁賤格，要挨人愛自己，仲要係挨唔到，唉，O記，你真係賤囉，尤如一條被遺棄嘅賤狗！好彩佢高抬貴手，聽漁護署嘅話，停一停，諗一諗，始終都要傷害我，而家係習慣被傷害嘅時候接受呢個傷害可能容易啲呢~~

此刻咁賤嘅我再一次踏上獨身嘅道路，絕對冇獨身恩賜嘅我只能夠盼望 神嘅帶領，將佢為我安排最好嘅帶到我嘅面前~~~~~~~

欲哭則不達，比一切都難受~~